Poslovne vijesti - Makedonija

Милкооп - прва кооператива за трговија со млеко

Подобро искористување на потенцијалите во примарното млекопроизводство преку здружување на фармерите е целта на првата кооператива за трговија со млеко Милкоопп што веќе почна со работа. Формирана е од фармери за нивно подобро организирање, развој и поголема сигурност во работата.

Како што велат од Милкоопп, идејата е, пред се, заштита на интересите на членовите и кооперантите. Секоја инвестиција ќе придонесе за повисок квалитет на млекото, подобри откупни цени и повисоко позиционирање во синџирот на набавки.

За своите кооперанти Милкоопп ќе понуди добра откупна цена. Воедно, на фармерите ќе им биде понудена квалитетна добиточна храна на одложено плаќање по прифатлива цена, обуки за хигиена на фарма и исхрана на кравите, правни совети, ветеринарни совети, проверка на квалитетот на млекото, но и помош околу обезбедувањето субвенции. Млекото ќе се продава на оние млекопреработувачи кои ќе обезбедат најдобри услови за откуп врз основа реални економски параметри.

Милкоопп ќе функционира согласно националната стратегија за развој на производството на квалитетно млеко. Ќе работи според законските определби и ќе соработува со сите надлежни институции во државата. Поддржана е од Федерацијата на фармери, а веќе има остварено средби и со претставници од Министерството за земјоделство.